ಬಿಳ್ಕೊಡುಗೆ

ಓ ಅತಿಥಿ.......
ಭಾರವಾಗುತಿದೆ  ಮನವು
ಆಧ್ರ ವಾಗುತಿದೆ
ಕಣ್ಣು ಗಳೆರಡೂ
ಬೇಗುತಿದೆ ಹ್ರದಯ
ನಿನ್ನ ಬಿಳ್ಕೊಡಲು

ಓ ಅತಿಥಿ.......
ನೀ ಬಂದೆ ಸೌಭಾಗ್ಯವಾಗಿ
ನೀ ತಂದೆ ಸೌಜನ್ಯವಾಗಿ
ಉಡುಗೊರೆಗಳನ್ನ
ಕಾರುಣ್ಯಕ್ಕಾಗಿ ಹತ್ತು
ಕ್ಷಮಾಪನೆಗಾಗಿ  ಹತ್ತು
ನರಕ ಮೋಚನೆಗಾಗಿ
 ಹತ್ತು..

ಓ ಅತಿಥಿ......
ಎಡವಿದೆನು ನಾ
ನಿನ್ನ ಸತ್ಕರಿಸಲು
ನೀ ಸಾಕ್ಷಿ ನುಡಿಯುವದಿನ
ಕಡೆಗಣಿಸದಿರು ಈ ನನ್ನ
ಬೇಡುವೆನು ಜಗದೊಡಯನಲ್ಲಿ
ಕರುಣಿಸು ನಮಗೆ ಹಲವಾರು
ಅವಸರಗಳನ್ನ  ಸತ್ಕರಿಸಲು ನಿನ್ನ

ಓ ಅತಿಥಿ......
ಇನ್ನೆಲ್ಲಿದೆ ಅತ್ತಾಳದ ಸಂಭ್ರಮ
ಇನ್ನೆಲ್ಲಿದೆ ಇಫ್ತ್ಹಾರಿನ ಸಂತಸ
ಇನ್ನೆಲ್ಲಿದೆ ತರಾವೀಹ್ ನ ಸಂಗಮ
ಇನ್ನೆಲ್ಲಿದೆ ಕಿಯಾಮುನ್ ಲೈಲ್ ನ 
ಸಮಾಪನ

ಓ ಅತಿಥಿ ...
ನಿನ್ನ ಬಿಳ್ಕೊಡುವ ಮುನ್ನ
ಪ್ರಾರ್ಥನೆ ಒಂದಿದೆ ನನ್ನ
ಸರ್ವ ಶಕ್ತನಲ್ಲಿ
ಮರಣವು ಸುನಿಶ್ಚಿತವು ನನಗೆ
ಎಂದಾದರು ಒಂದು ದಿನ
ಆಗಲಿ ಅದು ನಿನ್ನ ಮಡಿಲಲ್ಲಿ
ಅಮ್ಮನ ಮಡಿಲಲ್ಲಿ
ಕಂದಮ್ಮನ ನಿದ್ದೆಯಂತೆ
ಆಗಲಿ ಅದು ಲೈಲತ್ತುಲ್ ಕದಿರಿನ ರಾತ್ರಿ
ಆಗಲಿ ಅದು ಜಗನ್ನಾಥನಿಗೆ  ಸಾಷ್ಟಾಂಗ
ಎರಗಿದ ಆ ಶುಭ ಸಮಯ

ಓ ಅತಿಥಿ......
ಯಾರು ಯಾರಿಗೆ
ವಿದಾಯ ಹೇಳುತ್ತಿರುವುದು
ಇಲ್ಲಿ
ಗೊತ್ತಿಲ್ಲ ನನಗೆ
ನಾ ನಿನಗೋ ಅಲ್ಲ
ನೀ ನನಗೋ
ನೀ ಮರಳಿ ಬರುವಾಗ
ಬಾಕಿ ಇರಬಹುದೇ
ಈ ದೇಹವೂ ಈ ದೇಹಿ ಯೂ ..!!!

ಖರ್ಜೂರದ ನಾಡಲ್ಲಿ ಕುಳಿತು

ಖರ್ಜೂರದ ಎಲೆ
ಅಲ್ಲಾಡುವುದನ್ನೂ
ತಿಳಿಸಬೇಕೆಂದು
ಹಠ ಹಿಡಿಯುವ ಹೆಣ್ಣೇ
ನಿನ್ನಲ್ಲಿ ನಾನೆಷ್ಟು ಸತ್ಯಗಳನ್ನು
ಸಮರ್ಥವಾಗಿ ಅಡಗಿಸಿಟ್ಟೆನು

ಹಲವು ಸಲ ಪ್ರಯೋಗಿಸಿ
ಸವೆದು ಹೋದ
ಸುಖವೆಂಬ ಪದ ಮತ್ತೊಮ್ಮೆ
ಸಾಲ ತೆಗೆದು
ಹೇಳಲೇ ನಾನು
"ನನಗಿಲ್ಲಿ ಸುಖವೆಂದು"

ನನ್ನಲ್ಲಿ ನೀ ಹೇಳಿದ
ಮಾತು
ಮತ್ತೊಮ್ಮೆ  ಪ್ರತಿದ್ವನಿಸುತ್ತಿದೆ
ಕಿವಿಗಳಲ್ಲಿ
ನೀವಿಲ್ಲದ ರಂಜಾನ್ ಕಾಲ
ಅಮ್ಮ ಇಲ್ಲದ ಮನೆಯಂತೆ

ವ್ರತ ಮುರಿಯಲು
ಖರ್ಜೂರ ತೆಗೆದಿರಿಸುವಾಗ
ನೆನಪಿಸು ನೀ ನನ್ನ
ಕಾರಣ
ನಾನೀಗ ಖರ್ಜೂರದ
ಊರುಗಾರನಲ್ಲ .......

ಕೈ ಪುಣ್ಯ

ಅಮ್ಮಾ ...
ನಿನ್ನ ಬೈಗುಳಕ್ಕೂ
ಇದೆ ಕೈ ಪುಣ್ಯದ ಸ್ವಾದ

ಕಾದಿರುವಿಕೆ

ಮಗುವೇ......
ಕಾದಿರುವಿಕೆಯ
ಹೆಬ್ಬಾಗಿಳುಗಳು
ಮುಚ್ಚಿ ಹೋಗುವುದೆಂದು
ಗೊತ್ತು ನನಗೆ
ದಾರಿಗೆ ಕಣ್ಣಿಟ್ಟು ನಿಂತಿರುವ
ನಿನ್ನ ಮುಂದೆ
ಬಂದು ಸೇರುವೆನು ನಾ
ಒಂದು ದಿನ ಅತಿಥಿಯಂತೆ
ನಿನಗಾಗಿ ಕಾದಿರಿಸಿದ
ಆಟಿಕೆಗಳು ಒಡೆದು
ಹೋಗುವ ಮುನ್ನ
ಕಿತ್ತು ನೆಡುವೆನು ನನ್ನ
ಮತ್ತಿದೇ ಮರುಬೂಮಿಗೆ
ಕಣ್ಣೀರಿನ ಕಹಿ ರಸಗಳನ್ನು
ಅತ್ತರಿನ ಪರಿಮಳದಿಂದ
ಇನ್ನೆಷ್ಟು ದಿನ
ಮುಚ್ಚಿಡ ಬಲ್ಲೆ
ನಾನು ???

ವಿದವೆ

ವಿದವೆ

ನೆರಳಮರ ಕಡಿದು
ಜೀವನ ಬೇಗೆಯಲ್ಲಿ
ಒಬ್ಬಂಟ್ಟಿ ಯಾದವಳು
ವಿದವೆ

ವಿದವೆಯ ಹ್ರದಯ ವ್ಯಥೆಗಳು
ಸಾಗರ ಸಮ
ಕಥೆ ಅರಿಯದೆ
ಆಟಿಕೆಗಳಿಗಾಗಿ
ಕಾದಿರುವ
ಮಗುವನ್ನು ಕೈಯಲ್ಲ್ಲೆತ್ತಿ
ಮುಂದೇನೆಂದು ಅರಿಯದೆ
ಜೀವನ ಪಥದಲ್ಲಿ
ಬವಳಿ ಬೆಂಡಾದವಳೇ
ವಿದವೆ

ದಾರಿ ದೀಪಗಳ
ಹೀರು ಬತ್ತಿ
ನಂದಿ ಹೋದಮೇಲೆ
ಕಣ್ಣಲ್ಲಿ ಕತ್ತಲೆಯೇರಿ
ರೆಕ್ಕೆ ಬಳಲಿದ
ಒಂಟ್ಟಿ  ಹಕ್ಕಿ

ಪತಿ ಜೇವಿಸಿದ್ದೂ
ವಿದವೆಗಳಾದವರು
ಪ್ರವಾಸಿಗರ ಪತ್ನಿಯೆಂದಿರು
ಆದರೆ  ಸೂಫಿಯ ಮಅದನಿಯ
ಜೀವನವು ಬರೆಯದೆ ಹೋದ
ಪುಸ್ತಕವು ......

ಇಶ್ರಥ್ ಜಹಾನ್

ಅವಳೆದ್ದಳು
ಎಂದಿನಂತೆ ಅಂದೂ
ಅರಿವಿಲ್ಲದೆ
ಎದ್ದಿರುವುದು
ಇನ್ನೆಂದೂ ಎದ್ದೇಳದ
ಚಿರನಿದ್ದೆಗೆಂದು

ಅಕಾರಣ
ಅವಳೆದೆಗೆ ಗುಂಡಿಕ್ಕಿ
ಬಿಸಿ ರಕ್ತವ  ಕುಡಿದು ತೇಗಿದರು
ಅಸುರ ಜನ್ಮಗಳು
ಕಾರಣವಿಷ್ಟೇ
ಅವಳ ಹೆಸರಲ್ಲಿತ್ತು
ಇಶ್ರಥ್ ಜಹಾನ್

ಕಾರಣಕರ್ತ
ಇಂದಿಗೂ
ಒಂದು ಪಟ್ಟದಲ್ಲಿ ಕುಳಿತು
ಇನ್ನೊಂದು ಪಟ್ಟಾಭಿಷೇಕ್ಕಕ್ಕಾಗಿ
ಹಾತ್ತೊರೆಯುತ್ತಿರುವವನು .

ಪ್ರವಾಸಿ

ಪ್ರವಾಸಿ 

ಊರಿಗೆ ಹೋಗುವ
ಪ್ರವಾಸಿಗೆ
ಊರ ಬಾಲಕಿಯ
ಮನಸ್ಸು

ಉತ್ಸವ ದಿನದಂದು
ಹೊಚ್ಚ ಹೊಸ ಉಡುಪು ದರಿಸಿ
ನಲಿದಾಡುವ ಹೆಣ್ಣು ಮಗುವಿನಂತೆ

ಪರ್ಚೇಸ್ ಗಾಗಿ ಓಡಾಡುವವನು

ಮರಳುಗಾಡಿನ ಹುಡಿ ಗಾಳಿ
ಮರುಬೂಮಿಯ ಬಿಸಿ  ತಾಪದಿಂದ
ಕರಿದೋದ ಕೆನ್ನೆಗಳನ್ನು
ಕೋಣೆಯಲ್ಲಿ ಕುಳಿತು ಮಿನುಕಿಸಲು
ಶ್ರಮಿಸುವವನು

ಅವರಿಗೆ ಅರಿವಿಲ್ಲದ
ಬೆವರಿನ ಗಂಧವನ್ನು
ಅತ್ತರಿನ ಪರಿಮಳದಿಂದ
ಮರೆಯುವವನು

ರಜಾ ದಿನದ
ಮೂರುನಾಲ್ಕು ತಿಂಗಳು
ಸ್ವಂತ್ತ ಮನೆಯಲ್ಲಿಯೂ
ಅತಿಥಿ ಯಾಗುವವನು

ಬೀದಿ ವ್ಯಾಪಾರಿಯಂತೆ
ಕಟ್ಟುಗಳನ್ನು ಬಿಚ್ಚಿ
ಬಾಗ ಮಾಡಿ ವಿತರಿಸುವವನು

ಆದರೂ ಬಿಗಿ ಮುಖಗಳ
ನೋಟವನ್ನು ಎದುರಿಸಲಾಗದೆ
ತಲೆ ತಗ್ಗಿಸುವವನು

ಪತ್ರಾಸಿನ ದಿನಗಳುರುಳಿದಂತೆ
ಜನರೆಡೆಯಲ್ಲಿಯೂ
ಒಬ್ಬಂಟ್ಟಿಯಾಗುವವನು

ಅಂತರಾಳದಲ್ಲಿ ಅಗ್ನಿಯಾದರೂ
ಹೊರಗೆ ನಗುವ ಸೂಸಲು
ಕಲಿತವನು

ಗೊತ್ತು

ಆದರೂ
ನನ್ನೂರಿನ
ಹಚ್ಚ ಹಸಿರಿಗೆ
ಹಾರಿ ಇಳಿಯುವ ನಿಮಿಷ
ಹಗಲ ನಿದ್ರೆಯಲ್ಲಿಯೂ
ಕನಸ ಕಾಣುವೇನಲ್ಲ
ನಾನು